STATION OF THE CROSS CEBUANO
SINUGDANAN
PAG – AMPO
Makagagahum nga
Amahan, imong gipadala ang imong Anak si Jesus aron pagtudlo kanamo sa matarong
nga dalan sa kinabuhi, pagpadayag sa dalan sa Iyang krus. Nagtudlo Siya kanamo
nga “ang tawo nga magtinguha pagluwas sa iyang kinabuhi kawad-an hinoon niini,
samtang siya nga magtugyan niini sa ngalan ni Jesus makadawat sa kinabuhing
dayon”. Tabangi kami pagsabot niining maong pagtulon-an ug pagsunod kang Cristo
diha sa among pagpanaw sa among kinabuhi.
Hinigugmang Jesus, sa paglakaw
namo sa dalan sa imong krus, tudloi kami sa pagpamalandong sa kadautan sa among
kinabuhi nga maoy hinungdan sa imong mga kasakitan ug pag-antus. Tabangi kami
sa pagdawat sa imong pasaylo diha sa among pag-angkon sa among mga sala ug
kapakyasan nga imong gidaug pinaagi sa pagpaubos sa imong kabubut-on ug sa
hugot nga pagdawat alang sa kamatuoran aron usab makadaug kami batok sa sala ug
kamatayon, ngadto sa kabubut-on sa Amahan.
Itugot Ginoo nga, inabagan ug
linamdagan sa Espiritu Santo, Pasayloon kami sa among mga sala, ug maangkon
namo ang mga panalangin sa pag-antus ug kamatayon ni Cristo.
Santa Maria among Inahan,
Kuyugi kami niining dalan sa krus, duyog sa susamang espiritu diha kanimo sa
pagsunod mo kang Jesus ngadto sa bukid sa kalbaryo, ingon nga nagalaum kami
pagsunod kaniya uban ngadto sa ganghaan sa langit Amen.
Dios namo sa
kalooy
Ikaw ang among
Amahan;
Magbubuhat,
Manunubos,
Ug Ginoo sa nga
tanan
KORO
JESUS
MALOOY KA KANAMO
PASAYLOON
MO KAMI;
ANG
SALA GIDUMTAN NAMO
DILI
NA MAG-USAB KAMI
(Pari/Pangulo): Simbahon ka, O Cristo ug daygon Ikaw namo,
(Katawhan): Kay tungod sa Santa Krus gitubos mo ang
kalibutan.
PAMALANDONG. Dinhi sa sinugdanan sa dalan sa Kalbaryo masud-ong nato ang
pagkabalisa sa diosnong han-ay sa tanang butang: ang Anak sa Dios gihukman sa
tawhanong panghukom. Ang walay sala nga Cristo gisumbong sa pundok nga
makasasala atubangan sa usa ka tawo nga maghuhukom nga si Pilato nga nasayud sa
pagkainosente ni Jesus. Bisan pa niani, si Pilato huyang sa pagdapig sa
kamatuoran. Ug nagpadaug hinoon sa demanda sa katawhan. Ang hustisya
gisilotan og kamatayon sa inhustisya.
‘’Buot ni Pilato buhian si Jesus, Busa misulti siya
pag-usab ngadto sa mga tawo. Apan misinggit sila pagtubag kaniya: Ilansang Siya
sa Krus! Ilangsang Siya sa Krus! Sa ikatulo ka higayon miingon si Pilato
kanila:
Apan unsa bay sala nga nahimo Niya? Wala akoy
nakaplagan bisan unsa nga angay silotan sa kamatayon! Ipalatus ko siya ug
buhian!
” Apan nagpadayon sila pangsinggit ug kusog kaayo nga
si Jesus kinahanglan gayud ilangsang sa krus; ug nilampos gayud sila sa
katapusan. Busa gipahamtang ni Pilato kang Jesus ang silot nga ilang
gipangayo.”
PAG-AMPO. Ginoong
Jesus, gitugotan mo nga ikaw mahimong biktima sa inhustisya ug sa kadautan sa
mga tawo. Dili tungod kay miuyon ka sa dautang buhat apan kay buot mong
pagabayran ang mga sala sa katawhan, sa matag-usa ka tawo.
Bout mo ipakita kanamo ang kadaut nga nahimo namo
ngadto sa uban tungod sa garbo, sa kahuyang ug pagdumili sa pagdapig unta sa kamatuoran.
Tudloi kami, O Ginoo, sa mapaubsanong pag-angkon sa
among mga sala kon kami masayup, ug pagbarog alang sa kamatuoran ug hustisya
dinhi sa among kaugalingong kinabuhi ug atubangan sa tanan. Amen.
(Amahan namo…Maghimaya ka…Himaya sa…)
GINOONG JESUS KALOY-AN MO KAMI
Awit Pag-abot na sa hukmanan
Ni Pilato ginahukman
Sa tunok gipurong-purongan
Ug sa krus na gipapas-an. Koro
(Pari/Pangulo): Simbahon Ka, O Cristo ug daygon Ikaw namo,
(Katawhan): Kay tungod sa Santa krus gitubos mo ang kalibutan.
PAMALANDONG.Nahibalo kita nga ang atong kinabuhi dinhi sa
kalibutan dili gayud hingpit. Bisan gani sa atong tagsatagsa ka kinabuhi
masayup kita, mag-antus kita sa atong mga kahuyang. Ang pag-antus mahimo nga
magagikan sa uban tawo ug gikan sa kalibutan mismo. Kinahanglang makakat-on
kita sa pag sagubang niining mga kakulangan; sa pagpas-an sa atong krus. Sa adlaw
nga kita gibunyagan gipatikan kita sa timaan sa krus. Pinaagi niining mga palas
anon sa kinabuhi makabayad kita, sa atong pagkamakasasala, ug bahin makaambit
kita sa pag-antus ni Cristo tungod kanato.
‘’Unya
miingon si Jesus sa iyang mga tinun-an: Ang buot mahimong akong tinun-an
kinahanglan nga hikalimtam niya ang iyang kaugalingon, pas-anon niya ang iyang
krus, ug mosunod siya kanako. Kay ang buot moluwas sa iyang kaugalingong
kinabuhi mawad-an hinuon niini; apan ang mawad-an sa iyang kinabuhi tungod
kanako makabaton niini
PAG-AMPO. Ginoong Jesus, ang dalan padulong sa langit dili
sayon. Diha sa among paglakaw pagasulayan kami ug mahisukamod. Buot namo
buhaton ang maayo apan usahay among pili-on ang dautan ipagaan kining among
palas-anon diha sa among paglikay unta sa sala inabagan sa imong grasya.
Gihatagan mo kami ug daghang mga maayong butang sa
kinabuhi, Ginoo, ug nagpasalamat kami. Tabangi kami nga makontinto sa anaa ug
sa dili pagtinguha niadtong dili alang sa among kaayohan. Sama kanimo, abagi
kami sa pagpailub sa mga kakulang sa kinabuhi. Amen!
(Amahan namo…Maghimaya
ka…Himaya sa…)
GINOONG JESUS KALOY-AN MO
KAMI!
Awit Sa
pagpas-an n ani Jesus
Mihangad sa kahitas-an
Nahinumdon sa gipanubos,
Ug gihalad sa Amahan Koro
(Pari/Pangulo): Simbahon ka, O Cristo ug daygon Ikaw namo,
(Katawhan): Kay tungod sa Santa Krus gitubos mo ang kalibutan.
PAMALANDONG.Gawas ning hingpit nga kalibutan, ang Dios nag-andam
alang kanato ug lain pa hingpit nga langit. Hinoon, ang panaw padulong sa
kinabuhing tunhay kinahanglang pagasugdan dinhi sa kalibutan. Duna gyuy mga
kapakyasan sa atong paglakat, apan kinahanglan usab nga mopadayon kita hangtud
gayud sa katapusan.
Adunay una nga pagkadugmo, apan anaa pa
unyay daghang sunod niini gawas kon tinguhaon nato ang paglikay sa mga higayon,
gawas kon magpabilin kitang makanunayon kang Cristo pinaagi sa pag-ampo ang
pagdawat sa mga sacramento, ug diha sa atong pagsakripisyo.
‘’Miingon si Jesus sa iyang mga tinun-an:
Ako ang punoan sa paras, ug kamo ang sanga. Ang magpabilin Kanako ug ako diha
kaniya mamungag daghan; kay kon wala kamoy mahimo. Ang dili magpabilin kanako
mahisama sa usa ka sanga nga ibalibag ug malaya; pamuniton kini ug dauban.
‘’Kon magpabilin kamo Kanako ug ang
Akong mga pulong magpabilin kaninyo, makapangayo kamog bisan unsa, ug madawat
kini ninyo.’’
PAG-AMPO.Ginoong
Jesus, giangkon namo among pagkamakasasala. Nahulog kami sa sayop tungod kay
mibiya kami kanimo, apan unya sa among kahuyang giila namo ang among
panginahanglan kanimo. Dili unta namo kini kalimtan, nga diha lamang sa among
pakig-uban kanimo makalaum kami sa pagbuhat sa matarong ug sa pagtubo diha sa
Imong grasya.
Ginoo, tabangi kami sa pagbangon gikan sa sala. Hatagi
kamig kalig-on sa pagbalibad sa mga pagtental sa kalibutan ug sa limbong sa
among kinaiya. Ikaw lamang ang naghupot sa mga pulong sa kinabuhing walay katapusan.
Amen!
(Amahan namo…Maghimaya
ka…Himaya sa…)
GINOONG JESUS KALOY-AN MO
KAMI!
Awit Kining unang paghidugmo.
Ni Jesus ilawon sa Krus
Gibunalan ug gitukmod
Gi antus sa Manunubos Koro
(Pari/Pangulo): Simbahon Ka, O Cristo ug daygon Ikaw namo,
(Katawhan): Kay tungod sa Santa Krus gitubos mo ang kalibutan.
PAMALANDONG. Niining
higayona ang duha ka buotang tawo nanag-ambitay sa ilang pag-antus: ang
inosente nga anak sa makadiyut nakalimot sa kabug-at sa krus diha sa iyang
kalooy sa mahal Niyang Inahan, nga naguol ug maayo nga nagsud-ong sa gisilotan
nga anak.
Ang santa nga inahan nakasabot sa misyon sa anak nga
mag-antus ug magpakamatay alang sa mga makasasala. Busa iya usab bati-on ang kasakit.
Mahimo usab siyang biktima, ug sa ingon makaambit sa pagtubos, sa kaliwat nga
tawhanon.
“Si Jesus mipasidaan sa iyang mga sumusunod: kon
masilag kaninyo ang kalibutan himundumi, nga akoy unang gikasilagan niini. Kon
kamo iya pa sa kalibutan, higugmaon unta kamo sa kalibutan ingon nga iya sa
kalibutan. Apan gipili ko kamo gikan niining kalibutana, ug kamo dili na iya sa
kalibutan; busa masilag kaninyo ang kalibutan. Hinumdumi ang akong giingon
kaninyo: walay ulipon nga labaw sa iyang agalon.’’ (Juan
15: 18 – 20)
PAG-AMPO.
Daghan ang mga higayon o Ginoo, nga angay unta namong pas-anon ang Imong krus,
ang atong krus. Kinahanglan magpabilin gayud unta kaming malig-on sa among
hukom sa pagbuhat sa maayo lamang, sa tinuod lamang, bisan kon ang uban mga
tawo masilag kanamo. Apan sa makadaghan napakyas kami. Angay unta namong sundon
si Maria nga miuyon sa pag-antus uban Kanimo, ug sa among pagpakig-antus
makabayad kami sa kaugalingon namong mga sala.
Santa Maria inahan ni Jesus, ig ampo mo kaming
makasasala aron kami malig-on sa pag-atubang sa kasilag sa mga tawo inay
supakon namo ang dios. Amen!
(Amahan namo…Maghimaya
ka…Himaya sa…)
GINOONG JESUS KALOY-AN MO
KAMI!
Awit
Kaguol dili hitupngan
Ang gibati sa Inahan
Kasingkasing daw gilagbasan
Sa punyal sa kagul-ana. Koro
(Pari/Pangulo): Simbahon Ka, O Cristo ug daygon Ikaw namo.
(Katawhan): Kay tungod sa Santa Krus gitubos mo ang kalibutan.
PAMALANDONG. Sa
pagbuhat sa Dios kanato sumala sa iyang dagway ug kasamahan, gihatag niya
kanato ang pagsabut sa atong kaugalingon ug sa ubang mga tawo. Ang Dios
nakasabut kanato sa labing hingpit, busa daku ang iyang pagpailub kanato.
Nankinahanglan usab nga maninguha kita pagsabut sa kahuyang ug kakulang sa
uban.
Sa
maong paagiha usab unta ang atong kabubut-on pagtabang sa uban ilabi na sa mga
kabus ug sa way kahibalo, sa mga masakiton ug mga naguol. Sa ingon niana
matinuod gayud nga kita ang dagway sa Dios dinhi sa kalibutan.
“Gikan
sa sinagoga miadto si Jesus sa balay ni Simon ug ni Andres, ug kuyog nila si
Santiago ug si Juan. Niining higayona, ang ugangang babaye ni Simon gihilantan
ug naghigda. Sa pag-abut gayud ni Jesus didto; gisuginlan Siya mahitungod sa
masakiton. Giduol ni Jesus ang masakiton, gikuptan ang kamot ug gipabangon
siya. Dihadiha gihuwasan sa hilanat ang masakiton ug unya misilbi siya kanila.
Sa
pagsalop na sa adlaw, gidala sa mga tawo ngadto kang Jesus, ang tanang
masakiton, ug ang mga giyawaan, Ang tanang tawo sa lungsod didto, nagkapundok
sa atubangan sa bala (Marcos 1: 29 – 33)
PAG-AMPO. Ginoong
Jesus, sa tagsa-tagsa kanamo gihatag mo ang nagkalainlaing mga gasa sa
kinabuhi: mga kabtangan, kaantigohan, maayong lawas ug salabutan. Nagpasalamat
kami tungod niining mga gasa, Apan unya daghan sa among mga kaigsoonan
nagmakulang diha sa kinabuhi, ug ikaw maalamon nga mitugot niini, aron sama rag
mga managsoon magpaambit kami sa uban sa imong mga hinatag kanamo.
Sama
unta ni Simon nga mitabang kanimo, pahinumdumi kami sa pakigyayong sa kabug-at
sa kinabuhi nila nga nagkinahanglan kanamo. Agaka usab kami sa among pagkuyog
kanimo sa dalan padulong sa langit. Amen!
(Amahan namo…Maghimaya ka…Himaya sa…)
GINOONG JESUS KALOY-AN MO
KAMI!
(Pari/Pangulo): Simbahon
Ka, O Cristo ug daygon Ikaw namo,
(Katawhan): Kay tungod
sa Santa Krus gitubos mo ang kalibutan.
PAMALANDONG Sa wala pa ning higayona nakakita na si
Veronica sa dagway ni Jesus. Ang dagway sa usa ka mahigugmaong ug maayong tawo
apan karon, ubos sa kabug-at sa krus, kining nawong nga napuno sa singot, luwa
ug dugo, nahimong dagway sa kabangis sa tawo, naputos sa kahugawan sa sala ug
sa pagkadautan sa kalibutan.
Nagtinguha
si Veronica pagpapas niining makalilisang ug subo nga hulagway. Wala siya
mahadlok pag-atubang sa kasuko sa katawhan, ug iyang gipahid ang iyang gidala
nga panapton sa nawong ni jesus. Niining iyang buhat sa gugma nasaksihan
pag-usab sa mga tawo ang dagway sa kaayo nga Diosnon.
“Si
Cristo ang anak sa Dios moingon unya sa adlaw sa paghukom: kay gigutom ako ug
inyo akong gipakaon; giuhaw aku ug inyo akong gipainum; dumuduong ako ug inyo
akong gidawat sa inyong mga balay; hubo ako ug inyo akong gibistihan;
nagmasakiton ako ug inyo akong gialimahan; nabilanggo ako ug inyo akong giduaw.
Unya mitubag kaniya ang mga matarong, Ginoo,
kanus a man kami makakita kanimo nga gigutom ug gipakaon ka namo, o giuhaw ug
unya gipainum…? Mitubag siya kanila; sultihan ko kamo nga sa matag higayon nga
maghimo kamo niini alang sa usa sa labing ubos niining akong mga igsoon gihimo
ninyo kini alang kanako.’’ (Mateo 25:35 – 40)
PAG-AMPO. Ginoong
Jesus, tabangi kami nga makasud-ong unta sa imong dagway diha sa among
kaigsoonan. Hatagi kami sa grasya sa pagtan-aw sa kaayohan labaw pa kay sa
kadautan ug kahugaw sa kalibutan. Pinaagi sa maayong buhat mapasundayag unta
namo pag-usab ang larawan sa imong gugma alang sa tanan. Masabut unta namo nga
kami imong mga galamiton aron mawagtang ang tanang matang sa kahugawan ug
kadautan nga naglibut kanamo, aron ang kalibutan mahimong dapit nga angayang
pagapuy-an, aron ang mga gigutom makakaon, ang giuhaw maka-inum, ang hubo
kahatagan og isul-ob, ug ang nagsubo makakaplag ug kalipay.
Sa ingong paagiha usab, makita namo pag-usab ang imong
dagway dinhi sa matag-usa kanamo. Amen!
(Amahan namo…Maghimaya ka…Himaya sa…)
GINOONG JESUS KALOY-AN MO KAMI
(Pari/Pangulo): Simbahon Ka, O Cristo ug daygon Ikaw namo,
(Katawhan): Kay tungod sa Santa Krus gitubos mo ang kalibutan.
PAMALANDONG.Palandongon nato dinhi ang way puas nga tinguha sa
Dios ni Cristo, aron kita ma-iya gayud. Sa matag kadagma nato sa dalan sa
kinabuhi, sa matag sala nga atong mabuhat, ang Dios anaa kanunay nagdapit
kanato sa pagbangon gikan sa atong kapakyasan; Ingon niini ang pagka-walay
sukod.sa gugma sa Dios alang kanaton gikan pa sa iyang pagbuhat kanatodaan
nakitanggipilinga iyana gyud. Busa walay katarungan si bisan kinsa nga kawad-an
sa pag-laum, ang atong kapakyasan anaa diha, nga sa makadaghan dili kita
maminaw sa tingog sa Dios o atong balibaran ang pagdapit sa iyang gugma.
“Gipasabut ni Jesus sa mga tawo ang iyang pag-amoma niadtong magsunod
kaniya, bisan niadtong mibiya kaniya. Ako ang maayong magbalantay sa mga
karnero, ingon nga ang Amahan nakaila kanako ug ako nakaila sa Amahan, nakaila
usab Ako sa akong mga karnero ug sila nakaila sa Amahan. Nakita usab Ako sa
akong mga karnero ug sila nakaila kanako. Ug ako andam sa pagpakamatay alang
kanila.
Ako adunay mga karnero nga wala mahisakop niining torila. Kinahanglan
dad-on ko usab sila nganhi ug mamati sila sa Akong tingog ug mahimo silang usa
na lamang ka panon ubos sa usa ka magbalantay.” (Juan
10:14 – 16)
PAG-AMPO. Ginoong Jesus, ang among mga kasaypanan, ug ang
among walay panumbaling mao ang mga krus nga among gipas-an diha sa kinabuhi.
Mahimo baya unta nga wala kini sila, apan sa makadaghan among gituyoan pagbuhat
kanila, sa makaduha, makatolo, ug sa makadaghang pa gayud.
Bisan pa niana imo kaming gipasaylo, gitanyag mo ang
imong kamut aron sa pagbangon kanamo uban sa imong grasya. Ginoo tandoga ang
among mga hunahuna ug kasingkasing sa ingon nga magmalig-on kami sa tinuoray na
pagbiya sa sala ug sa among mga bisyo, aron kami mahibalik ug magpabilin sulod
sa toril sa imong gugma. Amen!
(Amahan namo…Maghimaya
ka…Himaya sa…)
GINOONG JESUS KALOY-AN MO
KAMI!
(Pari/Pangulo): Simbahon Ka, O Cristo ug daygon Ikaw namo,
(Katawhan): Kay tungod sa Santa Krus gitubos mo ang kalibutan.
PAMALANDONG. Ang
pagkamaloloy-on alang sa mga nag-antus, ang pakigbati sa mga naguol kini usa ka
birtud nga magpadayag nga kita mga anak sa Dios, kay ang Dios maloloy-on man.
Si Jesus mihilak sa pagkamatay sa iyang higala, nga si Lazaro; nalooy Siya sa
katawhan nga walay pagkaon. Misabut siya sa gibati sa mga nagmasakit, sa mga
buta, ug sila nga gipaantus sa mga demonyo. Ug iyang gibuhat ang iyang mahimo,
sila iyang giayo.
Sayon
da ang pagbati ug kalooy niadtong biniyaan sa palad sa kinabuhi apan ang
gikinahanglan mao nga adunay mahimo alang kanila, ang pagtabang sa uban kon
anaa kanato ang higayon sa pagtabang.
“Si
Jesus nahibalo kon unsay kasubo nga tawhanon. Unya wala madugay, miadto si
Jesus sa lungsod sa Nain mikuyog Kaniya ang iyang mga tinun-an ang usa ka
dakong pundok sa mga tawo. Sa pag-abot Niya sa ganghaan sa lungsod, mao gayoy
paggula sa mga tawo nga naglubong ug minatay.
Ang
minatay bugtong anak lalaki sa usa ka biyuda, ug mikuyog kaniya ang daghang mga
tawo gikan sa lungsod. Sa pagkakita ni Jesus sa biyuda, naluoy siya ug miingon
sa babaye ayaw paghilak. Unya miduol si Jesus ug gihikap Niya ang lungon, ug
mihunong ang mga tawo nga nagyayong sa lungon. Unya miingon si Jesus Ondo,
bangon milingkod ang minatay ug misulti, ug gihatag siya ni Jesus ngadto sa
inahan.” (Lukas 7:11 – 15)
PAG-AMPO. Ginoong
Jesus, ang paghatag sa ania kanamo, diha sa pulong ug sa buhat kini ang
pagtulon-an nga buot mo ipasabut kanamo. Ang mga babaye sa Jerusalem mihilak
tungod kanimo ang ilang mga luha alang kanimo, ug tungod sa kabangis sa imong
mga kaaway.
Dili
unta kami makapasubo sa uban. Hinoon kami makahayag unta ug makalipay sa
kinabuhi niadtong nagkinahanglan ug kini among pagabuhaton sa imong ngalan
Ginoo, himoa kaming andam kanunay sa pakigbati sa uban, ilabi na kanila nag
antus sa inhustisya, ug unya pagbuhat sa angayng buhaton. Amen!
(Amahan namo…Maghimaya ka…Himaya
sa…)
GINOONG JESUS KALOY-AN MO KAMI!
(Pari/Pangulo): Simbahon Ka, O Cristo ug daygon Ikaw namo,
(Katawhan): Kay tungod sa Santa Krus gitubos mo ang kalibutan.
PAMALANDONG. Ang
kabug-at sa krus ni Jesus wala mausab, apan ang iyang kusog mikunhod tungod sa
nagkaduitay niyang dugo, ang kainit sa adlaw, ug ang pagtungas sa Kalbaryo.
Nihisukamod siya sa ikatolo apan naabot ra gihapon niya ang iyang gipadulngan.
Ang pagasugdan sa Dios iya gayud pagatiwason. Ang gisaad ni jesus sa amahan ug
sa kaliwatan sa tawo iyang gituman pinaagi sa pagkamatay didto sa krus. Ania
dinhi kita kanunay mapakyas sa atong mga panaad sa pagbuhat lamang sa maayo
unta. Apan si Jesus mipakita sa pagkamakanunayon sa iyang gugma nga iyang
gimatuod hangtud sa katapusan ginhawa.
“Si
Jesus nagtudlo unsaon pagpabilin nga makanunayon sa iyang mga pulong busa ang
tanan nga makadungog sa akong gisulti ug nagtuman niini mahisama sa usa ka tawo
nga maalamon, nga nagtukod sa iyang balay diha sa bato. Sa dihang mibundak ang
ulan, ug mibaha ang mga suba, ug ang hangin mihapak ug mikusokuso niadtong
balaya, wala kini matumba kay natukod man diha sa bato.
Apan
ang tanan nga nakadungog sa akong gisulti ug dili magtuman niini, mahisama sa
usa ka tawong buangbuang nga nagtukod sa iyang balay diha sa balas, Sa dihang
mibundak ang ulan, ug mibaha ang mga suba, ug ang hangin mihapak ug mikusokuso
niadtong balaya, natumba kini ug nagun-ob.” (Mateo 7: 24 – 27)
PAG-AMPO. Ginoong
Jesus, makapila na kami napakyas sa pagbarog unta nga malig-on diha sa among
pagtoo, tungod lang kay among gipalabi ang among tawhanong mga kagustohan, o
nahadlok kami sa ubang tawo. Kining tawhanong mga panglantaw mao ang mga ulan
ug kahanginan sa kinabuhi nga nagsulay kanamo.
Kaayo unta kon kami makahinumdom sa imong mga pulong
nga maoy tinuod unta nga sukaranan sa among kinabuhi, nga dili unta namo
panumbalingon ang ubang tawo, ug nga kami molahutay pagsunod kanimo hantud sa
katapusan. Amen!
(Amahan namo…Maghimaya
ka…Himaya sa…)
GINOONG JESUS KALOY-AN MO
KAMI!
(Pari/Pangulo): Simbahon Ka, O Cristo ug daygon Ikaw namo,
(Katawhan): Kay tungod sa Santa Krus gitubos mo ang kalibutan.
PAMALANDONG. Latas sa katuigan sa atong panginabuhi kita nakaangkon
ug kabtangan, makabaton ug mga higala, ug naanad sa atong mga basatan. Daghang
ang mga higayon na sulayan ang atong mga prinsipyo, nga Christohanon sa diha
nga may peligro nga kita kawagtangan sa uban ug sa tanan nga atong naangkon.
Mao kini ang mga higayon nga kinahanglan atong barogan
ang giisip nato nga mas bililhon pa kay sa tanan nga ikadalit nato sa tawo ug
sa kalibutan. Gani, kon kining tanan mawala kanato, nga maangkon nato ang Dios.
Siya atong bahandi nga tinuod ug labing bililhon.
“Gilitok
ni Jesus ang ganti niadtong magsunod kaniya ang tanan nga mibiyag balay, mga
igsoon, amahan, inahan, mga anak, o mga uma tungod kanako, makadawat ug labaw
sa usa ka gatos ka pilo, ug hatagan pa gayud siyag kinabuhing dayon.”
(Mateo
18: 36 – 37)
“Sa laing bahin
miingon siya unsa may makuha sa usa ka tawo kon maangkon niya ang tibuok
kalibutan apan kawad-an siya saiyang kinabuhi?
Wala gayud! Waly bisan unsa nga ikahatag sa usa ka tawo aron mabawi niya
ang iyang kinabuhi.” (Marcos 8:36 - 37)
PAG-AMPO. Ginoong
Jesus, tudloi kami sa kaalam ug hatagi kami sa kalig-on diha sa hustong
pagpili-namo nga ang Dios ba o ang tawo. Tabangi kami sa pagsunod kanimo bisan
pa kon kawad-an kami ug mga higala o mga kabtangan. Hatagi kami sa grasya sa
pagsabut nga natawo kami sa kalibutan nga walay dala, ug nga motalikud kami nga
walay madala. Ikaw ra gayud nga among Dios ang magpabilin dinhi kanamo. Busa
angay nga kami magpabilin usab diha kanimo. Ug diha kanimo among maangkon ang
tanan. Amen!
(Amahan namo…Maghimaya
ka…Himaya sa…)
GINOONG JESUS KALOY-AN MO
KAMI!
(Pari/Pangulo): Simbahon Ka, O Cristo ug daygon Ikaw namo,
(Katawhan): Kay tungod sa Santa Krus gitubos mo ang kalibutan.
PAMALANDONG. Sa atong paghanduraw sa mga lansang nga milagpas sa
mga kamot ni Cristo, gipahinumdom kanato ang kasagaran nga bahin sa kinabuhi,
ang mga pag-antus ug kasakitan. Moabut kini sa nagkalainglaing paagi, mga sakit
sa lawas mga suliran, bisan ang Inadlaw natong kahago sa panginabuhi. Mao kini
ang tawhanong kahimtang nga atong kabilin, apan unya kinahanglan atong sabton
ang kaalam sa Dios sa paghatag sa maong silot. Kay diha sa mga kasakitan ug
kahago masukod nato ang atong katakus sa pag-angkon ug dignidad, pagpundo ug
mga merito nga atong gikinahanglan. Magpahiduol kita sa Dios. Isalig nato
kaniya ang tanan.
“Usa ka adlaw niana misakay si Jesus sa sakayan uban sa iyang mga
tinun-an ug miingon siya kanila. Manabok kita sa lanaw. Busa migikan sila.
Samtang naglawig sila natulog si Jesus. Unya mihuros ang usa ka dakong subasko
ug nasabwan ang sakayan, ug namiligro sila pag-ayo. Unya nanuol kang Jesus ang
mga tinun-an ug gipukaw Siya ug giingnan magtutudlo, magtutudlo, hapit na kita
malunod.
Mibangon si Jesus ug gipahunong niya ang
hangin ug ang nagpungasi nga mga balod milurang kini ug mibanos ang dakong
kalinaw. Ug miingon Siya sa mga tinun-an. Hain naba ang inyong pagsalig.” (Lucas
8: 22 – 25)
PAG-AMPO. Ginoong
Jesus, kon moasdang na kanamo ang kasakitan ug mga kalisud nganong kawad-an man
dayon kamig pagsalig imong gisaad nga ikaw kanunay makig-uban kanamo hangtud
gayud sa katapusan. Kini mao untay among kasigurohan ug paglaum. Ang imong
gugma kanamo ilabi na sa labing lisud nga mga pagsulay nga among atubangon.
Ginoo, hatagi kami sa pagtoo ug pagsalig kon kami
ilangsang sa among krus. Tudloi kami paghalad sa mga kasakitan ug kagul-anan
nga maoy among pakig-ambit sa imong pagpanubos, ang among tubag sa imong gasa
sa gugma. Amen!
(Amahan namo…Maghimaya
ka…Himaya sa…)
GINOONG JESUS KALOY-AN MO
KAMI!
(Pari/Pangulo): Simbahon Ka, O Cristo ug daygon Ikaw namo,
(Katawhan): Kay tungod sa Santa Krus gitubos mo ang kalibutan.
PAMALANDONG. Ang kamatayon, mao kini ang di-kalikayan nga agianan
sa panaw ngadto sa kinabuhi sa langit. Sa panghunahuna nga tawhanon kini daw
mao nay katapusan, apan diha sa Diosnong laraw kini maoy tinuod nga sinugdanan
ang mga kaaway ni Cristo naghunahuna nga nabuntog na nila si Jesus diha sa
ilang pagkadautan, apan sulod sa Diosnoong kasingkasing si Jesus nahibalo nga
Siya ang mananaog. Busa sa pagsinggit niya natapus na Consummatum est. Gipasabut nga natuman na niya ang hinungdan sa iyang
pag-anhi sa kalibutan. Atong buluhaton dinhi sa kalibutan, mao ang kahimoan sa
Dios, og natapos na nato ang atong buluhaton. Ang kamatayon mao na ang ganghaan
sa atong ganti sa langit.
“Sa
nagkahiduol na si Jesus sa adlaw sa Iyang pagkamatay, iyang gipasaligan ang mga
tinun-an ayaw kamog kaguol. Salig kamo sa Dios ug salig usab kanako. Sa balay
sa akong amahan adunay daghang mga lawak, ug moadto ako ron pag-andam ug dapit
alang kaninyo. Kon dili pa kini tinoud, dili ko unta kamo sultihan niini.
Ug
kon atua na ako didto ug makaandam nag dapit alang kaninyo, mobalik ako ug
kuhaon ko kamo aron asa ako, atua usab ka (Juan 14 –
13)
PAG-AMPO. Ginoong
Jesus, alang sa kadaghanan kanamo, ang kamatayon takna gayud sa kasubo. Apan
unya ang among pagtoo nagatudlo kanamo, ikaw mipahayag kanamo, nga didto tabok
sa among subo nga kagabhion naghulat ikaw kanamo sama sa kahayag sa sayong
kabuntagon.
Lig-ona kami niining pagtoo, O Ginoo. Tabangi kami sa
pagtuman sa tanang maayo nga among buluhaton samtang ania pa kami sa kalibutan,
aron kon imo na kaming tawgon nganha sa kinabuhi sa imong langit, mobiya kami
nga malipayon. Sa imong mga kamot, O Ginoo gitugyan namo ang among kalag. Amen!
(Amahan namo…Maghimaya
ka…Himaya sa…)
GINOONG JESUS KALOY-AN MO
KAMI!
(Pari/Pangulo): Simbahon Ka, O Cristo ug daygon Ikaw namo,
(Katawhan): Kay tungod sa Santa Krus gitubos mo ang kalibutan.
PAMALANDONG. Didto nagbarug si Maria, walay kukahadlok
nga naghalad sa iyang Anak ngadto sa langitnong amahan. Unya diha sa tiilan sa
krus iyang gidawat ang patayng lawas sa maong anak, walay bisan usa ka pulong
sa kaligutgot batok sa mga kaaway. Ang pagkamainantuson lang sa usa ka
masulub-ong inahan. Gigasa niya ang iyang Jesus ngadto sa kalibutan. Karon
iyang dawaton usab ang tibuok kaliwatan sa tawo sama nga iyang sinagup nga mga
anak. Mamahimo siyang inahan sa Iglesia, ang tigpataliwala sa Dios ug sa katawhan.
“Sa wala pa kawad-I si Jesus sa
katapusan Niyang ginhawa, iyang gihatag ang iyang inahan. Duol sa krus ni Jesus
nagbarog ang iyang inahan, ug ang igsoong babaye sa iyang inahan, si Maria nga
asawa ni Cleofas, ug si maria Magdalena.
Sa pagkakita ni Jesus sa iyang inahan ug sa
tinun an nga iyang gimahal nga nagbarog didto, miingon siya sa iyang inahan’’
babaye, ania ang imong anak.’’
Unya miingon siya sa tinun-an ‘’Ania
ang imong inahan.’’Sukad niadtong taknaa gipatipon si Maria pagpuyo sa mga
tinun-an.”
PAG-AMPO.
Ginoong Jesus, karon nga natapos na nimo ang imong misyon. Imong gigasa ngadto
sa kalibutan nga tawo nga labing duol sa imong kasingkasing si Maria imong
inahan. Sa pagdawat ni Maria sa imong patayng lawas gihakgom niya ang mga
kasakit ug kahuyang namong tanan. Si Juan ang minahal maoy mibarog sa ngalan
namo usa ka panig- ingnan sa gugma nga mahibalong mobalus.
Tudloi kami O Ginoo, sa paghigugma usab sa imong
inahan. Nahimo siyang among inahan, nan, tudloi kami sa pagpuyo nga buotan
gayud niyang mga anak. Amen!
(Amahan namo…Maghimaya
ka…Himaya sa…)
GINOONG JESUS KALOY-AN MO
KAMI!
(Pari/Pangulo): Simbahon Ka, O Cristo ug daygon Ikaw namo,
(Katawhan): Kay tungod sa Santa Krus gitubos mo ang kalibutan.
PAMALANDONG. Ang lubnganan ni Jesus, kinalot gikan sa
yuta, usa ka hinulman nga dapit, Sa iyang pagkatawo, hinulman usab ang pasilonganan
diin gipahimutang Siya sa pasungan dinha sa yuta. Ang pagkatimawa niining
katapusan ug sinugdanan alang kanato daan nang gilitok usab sa Dios sa pagsugod
sa kasaysayan sa tawo ‘’ikaw abog ug sa abog ikaw mobalik’’
Ipalahutay pa gyud ni Jesus kining pagtulon-ana sa
Iyang pag ingon nga walay butang dinhi sa kalibutan ‘’nga molungtad nga kita
angay magtinguha sa gingharian lamang sa langit.’’
“Gitudlo ni Jesus kon unsay tinuod nga bililhon alang
kanato. Ayaw kamo pagtigom ug mga bahandi dinhi sa yuta, kay kutkoton lamang
kini sa taya ug sa anay, ug makawat usab sa mga kawatan. Pagtigom hinoun kamo
ug mga bahandi didto sa langit diin walay taya ug anay nga makakutkot niini, ug
walay mga kawatan nga makakawat niini kay hain gani ang inyong bahandi, atua
usab didto ang inyong kasingkasing” (Mateo 6: 19 – 21)
PAG-AMPO. Ginoong Jesus, gihisgutan nimo ang tinuod, nga ang
mga bahandi sa langit nga among madala saylo sa lubnganan. Kadaku unta sa
grasya nga among madawat kon kanunay among hinumdoman ang imong mga pulong,
aron bisan kon panalanginan kamig mga butang nga yutan.on kini among gamiton sa
pagpalambo sa among kinabuhi nga kalagnon.
Sa ingon niini, moatubang kami kanimo puno sa tinuod
nga mga hiyas, sama sa buotan ug masinugtanong mga sulugoon nga magaambit sa
kalipay nimo nga among agalon. Amen!
(Amahan namo…Maghimaya
ka…Himaya sa…)
GINOONG JESUS KALOY-AN MO
KAMI!
KATAPUSANG
PAG-AMPO
GINOONG JESUS, nakasunod kami sa imong mga lakang gikan sa hukmanan
hangtud sa imong kamatayon, paglubong, pagkabanhaw ug pagsaka sa langit.
Namalandong kami sa imong pagsugot sa lagitnong amahan, sa imong pagpadayon
hangtud sa katapusan. Mao kini ang panig-ingnan nga gihatag mo kanamo kay ikaw
man ang dalan, ang kamatuoran ug ang kinabuhi.
Nagpasalamat kami kanimo Ginoo, tungod sa daghang mga
higayon nga kami imong gi agak sa pagbangon, apan nagkinahanglan gihapon kami
kanimo aron magpabilin kaming makanunayon sa amahan. Tabangi kami sa kalig-on sa
Espiritu santo alang sa pagtungab uban kanimo sa kalis sa sakripisyo ang
bayranan namo matag karon ug unya. Sama kanimo hinaut unta nga andam kami
kanunay pakig-ambit sa among kaugalingon alang sa kaayohan sa uban.
Unya inabagan sa imong grasya ikapasalig kanamo ang
among mahimayaong nga pagkabanhaw sa pagkamatay sa tawhanong kinaiya,
makabangon kami diha sa imong Diosnong gugma. kaugalingon alang sa kaayohan sa
uban.
Uban sa hinabang ni Maria, ang imo ug atong Inahan,
makapanlantaw kami sa unahan ngadto sa imong ginghari-an sa langit, diin wala
na unyay mga krus nga palas-anon, ang kalipay na lang sa pagdayeg kanimo, uban
sa Amahan ug Espiritu Santo, hangtud sa kahangturan. Amen!
(Amahan Namo…Maghimaya ka…Himaya sa… alang sa katuyo-an sa Santo Papa)
Mahimo kining
buhatonsa binagsa o sa pundok nga mag-ampo, gikan sa usa ngadto sa sunod nga
estasyon. Kadaghanan maghimo sa estasyon diha sa panahon sa penitensiya sulod
sa Kwaresma apan ang tanan gidapit sa pag-ampo niining maong debosyon bisan sa
unsang higayon sa tuig. Ang mga primero Biyernes sa bulan, mga adlaw sa
pagretiro ug ubang linaing mga higayon sa pagpenitensiya maoy hustong mga
panahon sa pagsunod sa masulob-ong pagbaklay ni Crsito ngadto sa Kalbaryo.
Ang tanan nga
maalampoong maghimo sa dalan sa Krus makadawat og Indulgensiya Plenarya uban sa
pagdawat sa santos nga Pagkawalat sulod sa maong adlawa.
Sa naandan ang
Dalan sa Krus himoon sulod sa simbahan, ilabi na sa panahaon sa Kwaresma. Apan
kini mahimo usab sa mga kapilya ug libot sa usa ka kasilinganan. Gidasig ang
mga amahan sa mga kabanayan nga maoy mangulo sa pagpangadye sa mga estasyon.
Kini maoy usa ka kustomber nga gipasiugdahan karon sa mga kabaryohan ug pundok
sa kapunongan dinhi sa matag kapilya.
Hinaut unta nga
kini mpagya diha sa mga Basic Ecclesial Communities (BEC) alang sa Cristohanong
pag-ugmad sa atong katawhan o katilingban sa mga magtotoo.
(Nota
Bene).
Alang sa minubo nga paagi, mahimo nga lab-angan ang ikaduhang bahin ang texto
gikan sa Ebanghelyo)